रौतहट । रौतहटका एक युवकले आफ्नै शरीरमा पेट्रोल छर्केर आगो लगाई आत्मदाहको प्रयास गरेका छन्।
गरुडा नगरपालिका–९ गम्हरियाका २८ वर्षीय गौतम कुमार सहनीले मंगलबार राति करिब १ बजे आफ्नै मोटरसाइकलबाट पेट्रोल निकालेर शरीरमा छर्किएपछि आगो लगाएको प्रहरीले जनाएको छ।
इलाका प्रहरी कार्यालय गरुडाका प्रमुख डिएसपी शंकरप्रसाद आचार्यका अनुसार सहनी केही समयदेखि मानसिक तनाव तथा डिप्रेसनबाट गुज्रिरहेका थिए। सोही अवस्थाका कारण उनले आत्मदाहको प्रयास गरेको प्रारम्भिक अनुसन्धानबाट खुलेको प्रहरीले जनाएको छ।
गम्भीर घाइते भएका सहनीलाई परिवारले तत्काल बेटर नेपाल अस्पताल, गरुडामा पुर्याएका थिए। त्यहाँ प्राथमिक उपचारपछि थप उपचारका लागि काठमाडौंस्थित कीर्तिपुर बर्न अस्पताल रिफर गरिएको छ।
जिल्ला प्रहरी कार्यालय रौतहटका प्रवक्ता डिएसपी बसन्त गौतमका अनुसार सहनीको घाँटीदेखि तलसम्म शरीरको करिब ३१.५ प्रतिशत भाग जलेको छ। उनको अवस्था मध्यम रहेको र कीर्तिपुर बर्न अस्पतालमा उपचार भइरहेको प्रहरीले जनाएको छ।
अस्पतालबाट बुधबार बिहान करिब ४ बजे घटनाको जानकारी प्राप्त भएपछि प्रहरी चौकी बिर्ताबाट असई मनोज दासको नेतृत्वमा प्रहरी टोली घटनास्थल पुगेको थियो। आवश्यक अनुसन्धान तथा घटनाको विवरण संकलनपछि बिहान ४ः१५ बजे सहनीलाई कीर्तिपुर बर्न अस्पताल पठाइएको प्रहरीले जनाएको छ।
सहनी गरुडा बजारस्थित झाझ पुलनजिक सानो छाप्रे होटल सञ्चालन गर्दै आएका थिए। उक्त व्यवसायबाट उनले आफ्नो परिवार तथा तीन छोराको पालनपोषण गर्दै आएका थिए।
प्रहरीका अनुसार घाइते सहनीका परिवारका सदस्यसँगको बुझाइमा उनी केही समयदेखि मानसिक समस्यासम्बन्धी औषधि सेवन गर्दै आएका थिए। साथै, उनले मदिरा सेवन गर्ने गरेको समेत परिवारले जनाएको प्रहरीले जानकारी दिएको छ।
घटनाबारे थप अनुसन्धान भइरहेको प्रहरीले जनाएको छ।
