काठमाडौं । पछिल्लो २४ घण्टायता सामाजिक सञ्जालमा तीनजना प्रहरीले गरेको कामको चौतर्फी प्रशंसा भएपछि उनीहरुको नाम चर्चामा छ ।
यसरी चर्चामा आउनेमध्ये २ जना नेपाल प्रहरीका छन् भने एकजना सशस्त्र प्रहरी बलका हुन् । नेपाल प्रहरीका चन्द्रिका देउवा, कुन्जाङ छोपेल शेर्पा र सशस्त्रका दन्त बहादुर छत्यालको नाम चर्चामा आएको हो ।
चर्चामा मात्र आएनन्, उनीहरु तीनैजनाको कामको कदर गर्दै संगठनले सम्मानसहित पुरस्कृत समेत गरेको छ । तर, उनीहरु कसरी चर्चामा आए ? के कारणले चर्चामा आए ?
त्यसैले सर्वप्रथम प्रहरी जवान देउवाबारे चर्चा गरौं ।
गत मंगलबार कैलालीमा एकजना गर्भवती महिलालाई सडकमा नै सुरक्षित प्रसूति गराएर आमाछोरीको ज्यान जोगाएपछि प्रहरी जवान देउवा चर्चामा आएकी हुन् । जुन कामको भिडिओहरु सामाजिक सञ्जालमा देख्न सकिन्छ ।
गोदावरी नगरपालिका–१, बसन्तपुरमा सडकमा छटपटाइरहेकी बझाङ थलारा गाउँपालिका–३ की चन्द्रा आचार्यको उद्धार गर्दै प्रहरी जवान देउवाले पद्मा अस्पतालसम्म पुर्याई सुरक्षित रूपमा शिशुको जन्म गराएकी थिइन् ।
पछिल्लो समय प्रहरीप्रति नागरिकहरुमा वितृष्णा बढेका बेला जवान देउवाको उक्त कार्यले प्रहरीको साख उठाएको छ । उनको मानवीय र साहसी कार्यप्रति संगठनले उनलाई सम्मान गरेको हो ।
चन्द्रिकाले आमा र बच्चाको ज्यान जोगाई प्रहरीको छविलाई उच्च बनाउन प्रशंसनीय भूमिका निर्वाह गरेको भन्दै प्रहरी महानिरीक्षक (आईजीपी) दीपक थापाले पुरस्कृत गरेका हुन् ।
त्यतिमात्र नभएर जवान देउवालाई प्रदेश प्रहरी कार्यालय र जिल्ला प्रहरी कार्यालय कैलालीले समेत अभिलेखमा जनिने गरी सम्मान गरेको छ । यस्ता साहसिक कार्य गर्ने प्रहरी जवानको बढुवा समेत गर्नुपर्ने भन्दै आवाज पनि उठेको छ ।
त्यसैगरी चर्चामा रहेकी अर्की पात्र हुन् शेर्पा
विश्वकै सर्वोच्च शिखर सगरमाथाको सफल आरोहण गरी फिर्ता भएपछि शेर्पालाई विशेष रूपमा बढुवा गरिएको छ । प्रहरी सहायक निरीक्षक (असई) रहेकी शेर्पालाई बुधबार बसेको नेपाल प्रहरीको बढुवा समितिको बैठकले प्रहरी नायव निरीक्षक (सई) मा विशेष बढुवा गर्ने निर्णय गरेको हो ।
प्रहरी महानिरीक्षक थापाको अध्यक्षतामा बसेको उक्त बैठकले शेर्पाको अद्वितीय योगदानलाई सम्मान गर्दै संगठनको नाम र गौरव उजागर गरेको ठहर गर्दै विशेष बढुवाको सिफारिस स्वीकृत गरेको बताइएको छ ।
त्यतिमात्र नभएर सगरमाथाको सफलतापूर्वक आरोहण गरेकी पहिलो महिला प्रहरी असई शेर्पालाई बिहीबार भब्य स्वागत समेत गरिएको छ । प्रहरी संगठनको गौरव बढाउन सफल भएको भन्दै उनलाई त्रिभुवन अन्तर्राष्ट्रिय विमानस्थालमा स्वागत गरिएको हो ।
नेपाल प्रहरीका प्रवक्ता समेत रहेका प्रहरी बरिष्ठ उपरीक्षक (एसएसपी) रमेश थापासहितका प्रहरी अधिकारीहरुले स्वागत गरेका हुन् । शेर्पाले २०८२ जेठ ५ गते विश्व को सर्वोच्च शिखर सगरमाथा सफलतापूर्वक आरोहण गरेकी थिइन् ।
यस्तै चर्चामा रहेको अर्का पात्र हुन् छन्त्याल
यस्तै सशस्त्रका असई दन्त बहादुर छत्याललाई समेत बढुवा गरिएको छ । सगरमाथाकै सफल आरोहण गरी साहसिक कार्य गरेबापत सशस्त्र प्रहरी बल, नेपालले उनलाई सशस्त्रको सई पदमा पदोन्नति गरेको हो ।
सशस्त्र प्रहरी महानिरीक्षक राजु अर्यालले जेठ ८ गते सशस्त्र प्रहरी नायव निरीक्षक पदमा बढुवा भएका सत्याललाई दर्ज्यानी चिन्ह प्रदान गर्नुकासाथै सगरमाथा सफल आरोहणको हार्दिक बधाई समेत दिएका छन् ।
यही जेठ ४ गते बिहान ९ः२० बजे उनले सगरमाथाको चुचुरोमा ‘सगरमाथा संवाद’ र सशस्त्र प्रहरी बल नेपालको झन्डा फहराएका थिए । सगरमाथा संवादको सन्देशसहित छत्याल सगरमाथा आरोहण लागि बैशाख १५ गते त्यसतर्फ प्रस्थान गरेका थिए ।
