विराटनगर । बुबाआमाको सपना थियो- छोरी इन्जिनियर बनोस्। प्रमिलाको आफ्नै सपना थियो- प्रहरीको वर्दी लगाएर देश र नागरिकको सेवा गर्ने। उनले दुवै सपना अधुरो रहन दिइनन्।
पहिले बुबाआमाको चाहनाअनुसार सिभिल इन्जिनियरिङ पढिन्, स्नातक गरिन्। त्यसपछि आफ्नो बाल्यकालदेखिको सपना पछ्याउँदै नेपाल प्रहरीमा प्रवेश गरिन्।
इन्जिनियरिङ पढ्दैमा जीवनभर त्यही पेसामा सीमित हुनुपर्छ भन्ने सोचलाई उनले स्वीकार गरिनन्। शैक्षिक योग्यता एउटा क्षेत्रमा हासिल गरे पनि आफ्नो रुचि र लक्ष्यअनुसार अर्को क्षेत्रमा अघि बढ्न सकिन्छ भन्ने उदाहरण बनेकी छन् उनी।
आज प्रमिला कार्की नेपाल प्रहरीकी प्रहरी निरीक्षकका रूपमा कार्यरत छिन्। जिल्ला प्रहरी कार्यालय मोरङमा रहेर उनले महिला, बालबालिका तथा ज्येष्ठ नागरिकको क्षेत्रमा समुदायमैत्री प्रहरी सेवा प्रदान गर्दै आएकी छन्।
प्रहरी सेवामा रहेर नागरिकसँगको सम्बन्ध सुमधुर बनाउने, महिला तथा बालबालिकाका समस्यालाई सम्बोधन गर्ने र समुदायमा प्रहरीप्रतिको सकारात्मक छवि निर्माण गर्ने कार्यमा उनले महत्त्वपूर्ण योगदान पुर्याएकी छन्।
उनको यही मेहनत, समर्पण र सेवाभावको कदर गर्दै ७१औँ प्रहरी दिवस–२०८३ को अवसरमा ‘उत्कृष्ट महिला प्रहरी पुरस्कार’ प्रदान गरिएको छ।
कोशी प्रदेश प्रहरी कार्यालय, विराटनगरले उनलाई २५ हजार रुपैयाँ नगद र प्रशंसापत्रसहित सम्मान गरेको हो। पुरस्कार कोषकी संस्थापक शिला श्रेष्ठ बज्राचार्यले उनलाई चेक तथा प्रशंसापत्र हस्तान्तरण गरेकी थिइन्।
महिला प्रहरीको मनोबल बढाउने र उत्कृष्ट कार्य गर्ने महिला प्रहरीलाई प्रोत्साहित गर्ने उद्देश्यले २०८१ सालमा यो पुरस्कार स्थापना गरिएको हो। यस पुरस्कारबाट हरेक वर्ष एक जना उत्कृष्ट महिला प्रहरीलाई सम्मान गरिँदै आएको छ।
एउटा निर्णय, दुई सपना पूरा
प्रमिलाको कथा केवल इन्जिनियरबाट प्रहरी निरीक्षक बनेको व्यावसायिक परिवर्तनको कथा मात्र होइन। यो आफ्नो रुचि र लक्ष्यप्रति इमानदार रहेर अघि बढ्ने साहसको कथा पनि हो।
उनले बुबाआमाको सपना पूरा गर्न आफ्नो पढाइलाई निरन्तरता दिइन्। तर त्यसो भन्दैमा आफ्नै सपना त्याग्नुपर्छ भन्ने सोच राखिनन्। परिवारको चाहना र आफ्नो इच्छाबीच सन्तुलन कायम गर्दै दुवै लक्ष्य हासिल गर्ने बाटो रोजिन्।
उनको यात्राले छोरीहरूका लागि अवसर र विश्वास कति महत्त्वपूर्ण हुन्छ भन्ने पनि देखाउँछ। कुनै एउटा विषय पढेको कारण भविष्य त्यही क्षेत्रमा सीमित गर्नुपर्छ भन्ने छैन। इच्छाशक्ति, मेहनत र दृढ संकल्प भए आफ्नो शैक्षिक योग्यताभन्दा फरक क्षेत्रमा पनि नयाँ पहिचान बनाउन सकिन्छ।
आज प्रमिलाको काँधमा प्रहरी निरीक्षकको फुली छ। उनको शैक्षिक परिचयमा सिभिल इन्जिनियरिङ छ भने व्यावसायिक परिचयमा नेपाल प्रहरीको सेवा छ। बुबाआमाको सपना पूरा गरेकी उनले आफ्नै बाल्यकालदेखिको चाहनालाई पनि सफलतामा बदल्न सकेकी छन्।
प्रमिलाको सफलताले एउटा सन्देश दिएको छ- छोरीले परिवारको सपना पूरा गर्दै आफ्नै सपना पनि पूरा गर्न सक्छिन्। त्यसका लागि चाहिने कुरा हो, अवसर, आत्मविश्वास र निरन्तरको मेहनत।
