काठमाडौं । सशस्त्र प्रहरी बल सर्लाहीले बुधबार जिल्लाको छतौनाबाट ठूलो परिमाणमा फर्सिको बीउ नियन्त्रणमा लियो। चार वटा भारतीय नम्बर प्लेटका पिकअप गाडीमा लोड गरी भारततर्फ लैजान लागिएको अवस्थामा उक्त बीउ बरामद गरिएको हो। घटनामा एक नेपाली नम्बरको ट्रकसमेत नियन्त्रणमा लिइएको छ।
प्राप्त जानकारीअनुसार भण्डारण गरिएको स्थानबाट फर्सिको बीउ नेपाली ट्रकमा लोड गरी विभिन्न स्थानमा ओसारपसार भइरहेको अवस्थामा ट्रक नियन्त्रणमा लिइएको हो।
यद्यपि बरामद गरिएको सामानको वास्तविक स्वामित्वबारे सम्बन्धित निकायले औपचारिक रूपमा केही खुलाएको छैन। तर सुरक्षा स्रोतहरूका अनुसार उक्त कारोबारमा लामो समयदेखि सीमावर्ती क्षेत्रमा सक्रिय भनिएका उमेश साह तेलीको संलग्नता रहेको आशंका गरिएको छ।
स्रोतका अनुसार भारतीय मूलका भनिएका साहले पर्साको वीरगञ्ज केन्द्र बनाएर नेपाल–भारत सीमावर्ती जिल्लाहरूमा एजेन्टमार्फत फर्सिको बीउ, काजु, चिनी, कफीका गोटा, कपडालगायत सामग्रीको अवैध कारोबार सञ्चालन गर्दै आएको आरोप छ। भारतीय सुरक्षा निकायका केही स्रोतहरूले पनि उनी विभिन्न तस्करी गतिविधिमा संलग्न रहेको दाबी गरेका छन्।
उमेश साह भारतिय कस्टम विभागको मोस्ट वाण्टेड सूचीमा रहेको बताइन्छ। जसले गर्दा उनी भारत जाँदा विभिन्न रुपमा जाने गरेको उनलाई नै नजिकबाट चिन्ने एक व्यापारीले बताए। पछिल्लो समय उनले पर्सादेखि सर्लाहीसम्म तस्कर गराउँदे आएका छन्।
पूर्व प्रहरी हवल्दारको भूमिकामाथि प्रश्न
सुरक्षा स्रोतहरूका अनुसार पूर्व प्रहरी वरिष्ठ हवल्दार जयमंगल सिंहको (कतिपय स्रोतले राजमंगल सिंह भनेर समेत चिनाउने) उनै उमेश साहको नेटवर्कसँग सम्बन्ध रहेको बताइन्छ। उनीसँग विजय यादव, सन्तोष सिंह, राजेश ठाकुर र सुरेश जैसवाललगायत व्यक्तिहरूको समूह सक्रिय रहेको स्रोतको दाबी छ।
उनीहरुमध्ये राजमंगल सिंहले मधेसमा आफ्नो छुट्टै तस्करको साम्रज्य खडा गर्न लागिपरिरहेका छन्। बुधबार सर्लाहीबाट भारतीय नम्बर प्लेटका पिकअप गाडीमा लोड गरी भारततर्फ लैजान लागिएको अवस्थामा ठूलो परिमाणमा बरामद फर्सीको बीउको कारोबारमा साह सिंहको कनेक्सन रहेको बताइन्छ।
जयमंगल सिंह विगतमा मधेस क्षेत्रमा विभिन्न प्रहरी अधिकारीहरूको कार्यकालमा सादा पोसाकमा परिचालित ‘घुमुवा’ टोलीसँग आबद्ध रहेको बताइन्छ। सिंह कोशी प्रदेशका डिआईजी बिनोद घिमिरे रौतहटको एसपी हुँदा पनि घुमुवा प्रहरीको रुपमा परिचालन भएका थिए ।
पछि यज्ञविनोद पोखरेल मधेसको डिआईजी हुँदा पनि उनै घुमुवाको कमाण्डर जस्तै थिए । त्यसअघि मधेसको डिआईजी रहेका पूर्वप्रहरी प्रमुख धीरज प्रताप सिंहको पनि घुमुवा भएर काम गरे। यसरी उनले मधेसमा आफ्नो दबदबा कायम गरेका थिए ।
पछि उनले राजीनमा दिएका हुन्। राजीनामा दिनुको पनि छुट्टै कराण छ। प्रहरी प्रधान कार्यालयले निर्वाचनअघि मधेस प्रदेशमा परिचालित विवादास्पद घुमुवाहरूलाई फिर्ता बोलाउने क्रममा उनी पनि तानिएका थिए।
स्रोतहरूका अनुसार उनीमाथि सम्पत्ति आर्जन र कार्यशैलीबारे उजुरी परेपछि अनुसन्धानको दायरामा परेका थिए। अनुसन्धान जारी रहेकै अवस्थामा उनले प्रहरी सेवाबाट राजीनामा दिएको बताइन्छ। उजुरी शाखा विश्वस्त स्रोतका अनुसार अकुत सम्पत्ति आर्जन गरेको आरोप लागेपछि उनले विभिन्न च्यानल प्रयोग गरेर राजीनामा दिएको थिए।
स्थानीय सुरक्षा वृत्तमा सक्रिय केही स्रोतहरूले सिंहले सीमावर्ती जिल्लाका प्रहरी अधिकारीहरूसँग पहुँच प्रयोग गरी तस्करी गतिविधिलाई संरक्षण दिने गरेको आरोप छ। सर्लाही र रौतटहको एसपीलाई उनी आफैंले लाइन आफैं मिलाउने काम गर्ने गरेको समेत स्रोतको दाबी छ।
यस विषयमा सिंहले आफुले राजेश साह नामको व्यक्तिलाई नचिनेको दाबी गरेका छन्। स्कुपखबरसँगको कुराकानीमा आफुले त्यो मान्छेसङ मिलेर कुनै काम नगरेको बताए।
फर्सिको बीउ बरामद प्रकरणसँगै सीमावर्ती क्षेत्रमा सक्रिय भनिएका तस्करी सञ्जाल, त्यसमा संलग्न भनिएका व्यक्तिहरू तथा उनीहरूको सम्पत्तिको स्रोतबारे निष्पक्ष र गहन अनुसन्धान हुनुपर्ने आवाज उठ्न थालेको छ।
