काठमाडौं । हाल नेपाल प्रहरीमा ८ वटा नायब महानिरीक्षक (डिआईजी) पद रिक्त छ । रिक्त ८ डिआईजी पदमा सरकारले बढुवाको तयारी थालेको छ ।
उच्च स्रोतका अनुसार डिआईजी बढुवाका सम्भावित उम्मेदवारहरुको कार्यसम्पादन मुल्यांकन खोलेर हेरिसकेको छ ।
गतहप्ता नै गृहसचिव गोकर्णमणि दुवाडीको नेतृत्वमा आईजीपी वसन्त कुँवर समेतको टोलीले बढुवाका सम्भावित उम्मेदवारहरुको कार्यसम्पादन मुल्यांकन नम्बर चेकजाँच गरेको बुझिएको छ ।
आईजीपी कुँवरले यसअघिको बढुवामा विवाद देखिएपछि विवादरहित बनाउने प्रयास गरिरहेका छन् । अहिले रिक्त रहेको डिआईजीका लागि तीन टोली दाबेदार देखिएका छन् ।
आईजी कुँवरकै ब्याचका तीनजना बाहेक पछिल्ला ब्याचका एसएसपीहरु पनि बढुवाका लागि लागिपरेका छन् । जसका लागि २०५३ मा भर्ना भएको टोली र २०५४ को टोली पनि बढुवाको रेसमा छन् ।
कार्यसम्पादन मूल्याकंनमा जेष्ठताको आधारमा प्रहरी बरिष्ठ उपरीक्षक (एसएसपी) सुशिल सिंह राठौर पहिलो नम्बरमा, सिद्धिविक्रम शाह दोस्रो नम्बरमा, उमाप्रसाद चतुर्वेदी तेस्रो नम्बरमा, दिनेश आचार्य चौथो नम्बरमा परेको भेटिएको स्रोतले जानकारी दिएको छ ।
त्यस्तै पाँचौं नम्बरमा गणेश चन्द, छैठौं नम्बरमा ओम बहादुर राना र सातौं नम्बरमा भोला रावल र आठौं नम्बरमा ध्रुवराज राउत परेको बताइएको छ ।
राठौर, शाह, चतुर्वेदी र राना २०५३ को सिनियर टोली हो भने आचार्य, २०५४ को टोली हो । यस्तै चन्द, रावल र रावत चाहिँ आईजीपी कुँवरकै ब्याची हुन् ।
स्रोतका अनुसार कार्यसम्पादन मूल्याकंन नम्बर हेरेपछि गृहसचिव दवाडीले गृहमन्त्री रमेश लेखकलाई पनि सोहिअनुसार ब्रिफिङ गरेका छन् ।
त्यस्तै राजेन्द्र प्रसाद भट्ट, डम्बर बहादुर विक, हिमालय कुमार श्रेष्ठ, ईश्वर कार्की, अरुण पौडेल, गोविन्द थपलिया, माधव श्रेष्ठ, मनोज कुमार यादव, दिपेन्द्र घर्ति क्षेत्रीलगायतका एसएसपीहरु पनि प्रतिस्पर्धामा छन् ।
